ŽELONDA
Kad paso fešta sv. Kuzme i Damjana, dorene i zodnji mih masta u konobe, udru parve kiše i lišće u gori počne žutit, a u ariji se čuti promina, vajo se spremat - počinje želonda ( prelet ptica sa sjevera prema toplom jugu ) Tradicija želonde tj. lova tić u Grobje je poznata od pamtivjeka, više nego u druga sela. Zoć je to tako nikad nison sazno, ka ni zoć to ni običaj na drugim škojima osim Visa. Ka dite slušo son tičare na Miriću i njihove debate, koliko pašaja, koliko se gardelinih, faganelih , verdunih, lugarinih i frazulinih čapalo, koliko obaralo.
Ali da se razumimo - lovilo se somo nedijom i to do mise, nikad radnim donom jer je vajalo hodit upoje, lavrat. A ni tičar ni mogo bit svak… A bilo ih je puno, toliko da se ni moglo odlučit di će ko i da ne bude svađe , subotom navečer vadi bi se brušket.
Pozicije su počevši od istoka : Garme, Roskarsnica, Vordišće, Na Salbun, Oklada, Gornja kopanja, Korita, Japjeni put, Navarh Gornjovih i Zelenice…
“ Mišoj više, ala homo - tresli su se tičari koju boju poziciju čapat jer neke su bile boje neke gore, ali tić je bilo svuda, puno, puno više nego sad i somo se gledolo unebo, koje će vrime, hoće li vitar, dorž….
A išlo bi se rano, jer vajalo je ubrat arbaret, namazot baketine i to sve do svanuća jer let bi poče odma i parvi faganel bi je i nojboji…
A lovilo se i na mrižice, ali veći gušt bi je na višć, koji se u početku čini od sirove gume i gumileze, pa kad bi ugrijolo zno bi omekšat i tiči bi bižoli uz velike beštime. Koliko li je postolih izgubilo đone, poplate zno nojboje moj otac, postolor Ive.
Govorilo se da je velik tičar bi i naš pop , don Jakov Račić iz Varbanja,a njegova konoba puna tić. Nebi zno, a ni želi izostavit sve one kojima je to bi gušt, ali ća se spominjem navest ću od zgora : Miko i Ive Tomičin, Ive Petrov, Karmelo i Jozo Jurić, Dinko Dončetov, Miko Lukin, Miko Zoranić u Pogonjicu Luka Pavotov, Jako Štrakotov, Marinko Petrov u Molu bondu Antun Malabonkin - Veli Jure Pere i za mene nojžešći Jure Karlaboškin (sada u Čileu) koji me zarazi, nauči…
Za svih njih tić, a pogotovo gardelin bi je bog, svetinja…
A meni je nojdraže bilo lovit i dočekot zoru na našu Raskarsnicu - čutit parvu rosu, huk sove sa Kose, plivarice na pučini, sunca sjoj iznad Biokova, ka na pjatu Bol, Broč, Sušac, okružen pojima kojima nikad kraja ni divljenja : od Vale, Loze, Vele Pazuhe, Store Vale, Glavice, Gojenića, Kampanela, Moće Dubovih dolcih, Debelog rata… koje li somo gomile ka po špogu izlivene - kamena lipota naših storih!
I sad smo opet i uvik vikendom na Roskarsnicu, tićih i ni više ka pri, ali ni ni važno - lipo li se opet sastat, popričat, marendat, divit pojima našim i odoržat tradiciju naše dobre grobajske želonde.
IVICA ZANINOVIĆ MALABONKIN
18.10.2011.